19-августта КР Шайлоо жана референдум өткөрүү боюнча борбордук шайлоо комиссиясынын төрайымы Н. Шайлдабекова Кыргызстандан тышкары жашап жаткан КР жарандары менен төртүнчү онлайн жолугушуу өткөрдү. Жолугушуунун темасы 2020-жылдын 4-октябрына дайындалган КР Жогорку Кеңешине шайлоо өткөрүүнүн маселелери болду.
Жолугушуунун жүрүшүндө жарандар чет өлкөлөрдө добуш берүүнүн шарттары, шайлоочулардын тизмесине кошуу жана консулдук каттоого туруу суроолору боюнча толук жоопторду алышты.
БШК төрайымы катышуучуларга шайлоо процессинин инклюзивдүүлүгүн жогорулатууга багытталган шайлоо мыйзамдарындагы жаңылыктар тууралуу айтып берди.
“Кыргыз Республикасынын Президентин жана КР Жогорку Кеңешинин депутаттарын шайлоо жөнүндөгү” конституциялык мыйзам, шайлоо участокторун чет өлкөлөрдөгү Кыргыз Республикасынын дипломатиялык өкүлчүлүктөрүндө жана консулдук мекемелеринде ошондой эле КР мамлекеттик органдарынын өкүлчүлүктөрүндө түзүүгө жол бере тургандыгы айтылды.
2020-жылдын 4-октябрында ЖК депутаттарын шайлоого карата чет өлкөлөрдө түзүлгөн шайлоо участокторунун жалпы саны – 44. Биринчи жолу Иркутск, Сургут, Южно-Сахалинск жана Якутск шаарларында КРдин Россиядагы элчилигинин канцеляриялары ачылып, аларда шайлоо участоктору түзүлдү. Мындан тышкары Париж жана Римде да биринчи жолу шайлоо участоктору ачылды. АКШдагы кыргызстандыктар Вашингтондогу Кыргызстандын АКШдагы элчилигиндеги шайлоо участогунда добуш бере алышат.
Маалымат үчүн: Онлайн жолугушуулар ар бир шаршембиде Бишкек убактысы боюнча саат 18де ИИМ, Мамкаттоо кызматы, ПРООН жана Эл аралык миграция уюмунун жардамы аркылуу өтүп келет. Мурдагы жолугушуулар 29-июлда Түркиядагы кыргызстандыктардын коомдук уюмдарынын өкүлдөрү менен, 5-августта Россияда жана Казакстанда жашаган КР жарандары менен, 12-августта КМШ өлкөлөрүндөгү мекендештер менен өткөрүлгөн.
26-августта Азияда жана Жакынкы Чыгышта жашаган мекендештер менен өтөт. Коронавирус пандемиясынан улам бардык жолугушуулар жарандардын ден соолугун коргоо максатында онлайн режимде болуп жатат.
