2020-жылдын 19-августунда КР Жогорку Кеңешинин депутаттыгына талапкерлердин тизмесин саясый партиялардын көрсөтүүлөрү соңуна чыкты. Мурда кабарлангандай, парламенттик шайлоого катыша турган ниетин 44 партия билдиришкен.
Талапкерлерди көрсөтүү мөөнөтү аяктап калган убакта өз сьезддерин өткөрүп анда талапкерлеринин тизмесин 23 партия бекитти. Ал эми 10 партия парламенттик шайлоонун мындан аркы иштерине катышпай тургандыгын БШКга оозеки билдиришкен. Тогуз партия болсо мындан аркы шайлоого катышпай тургандыгын БШКга расмий кабарлашты. Бир партия болсо мындан аркы шайлоо кампаниясына катыша тургандыгы же катышпай тургандыгы боюнча кабар берген жок.
11 саясый партия КР БШКга сьезд өткөрө тургандыктары боюнча расмий кабар айтышып, Боршайкомдун өкүлдөрү аларга катышты. БШК өкүлдөрү катышкан сьезддерде талапкерлердин тизмесин бекитүүдөгү жашыруун добуш берүү же кандайдыр бир башка процедуралар бузулгандыгы катталган жок. Партиялар жалпысынан сьезддерди өткөрүүдө Республикалык штабдын жарандардын ден соолугун коргоо жана санитардык-эпидемиологиялык талаптарды сактоо боюнча сунуштарды сакташты.
Эми партиялар 24-августтун саат 18:00нө чейин БШКга документтердин пакетин тапшыруулары зарыл. Бул мындай документтер:
1) саясый партиянын жетекчисинин колтамгасы, мөөрү коюлуп, талапкерлердин тизмесин көрсөткөндүгү боюнча саясый партиянын чечими;
2) тизмеге кирген талапкердин биографиялык жана башка маалыматын көрсөтүп өз колу менен толтурулган атайын формасы, паспортунун көчүрмөсү, иштеген же окуган жеринен маалымдама, башка мамлекеттин жарандыгына ээ эместиги боюнча маалымат, соттуулугу жөнүндө, башка өлкөнүн жарандыгы бар же жок экендиги боюнча (анын ичинде мурдагы жарандыгы, башка жарандуулугу) персоналдуу маалыматтарды иштеп чыгууга кат түрүндөгү макулдугу;
3) шайлоо күрөөсүн кошкондугун күбөлөгөн документ.
Талапкерлердин тизмеси жана талапкер жөнүндөгү маалыматтар БШК бекиткен форма боюнча кагаз түрүндө да, электрондук вариантта берилиши керек. Бул быйылкы шайлоодогу жаңылык. Маалыматтар “Электрондук кандидат” программасына киргизилип, бул шайлоочулар үчүн электрондук маалымат базасын түзүүгө жардам берет.
Мындан тышкары БШК ала турган электрондук маалыматтар мекемелер аралык өз ара аракеттенүүнүн электрондук системасы “Түндүк” үчүн жыйналат, анткени бардык зарыл маалыматтарды байланышсыз, обьективдүү форматта текшерүү үчүн керек.
Ошонун ичинде “Түндүк” системасы аркылуу Мамкаттоо кызматынын маалыматтар базасында турган паспорт тууралуу маалымат, ИИМ менен да тиешелүү иштешүүдөн соң талапкерлердин соттуулугу жөнүндө маалымат текшерилет. Система саясый партиялардын талапкерлеринин тизмесин тапшыруу процедурасын жеңилдетет.
