Кыргыз Республикасынын шайлоо жана референдум өткөрүү боюнча борбордук комиссиясынын төрайымы Н. Шайлдабекова 12-августта Кыргызстандан тышкары жашаган жарандар менен 2020-жылдын 4-октябрында Жогорку Кеңешке депутаттарды шайлоо маселелери боюнча үчүнчү онлайн жолугушууну өткөрдү.
Онлайн жолугушуулар ар шаршембиде Бишкек убактысы боюнча саат 18:00дө ТИМ, Мамлекеттик каттоо кызматы, ПРООН жана Миграция боюнча эл аралык уюмдун биргелешкен аракети менен өтүп келет. Биринчи жолугушуу 29-июлда Түркиядагы кыргызстандыктардын коомдук бирикмелеринин өкүлдөрү менен болуп өткөн. 5-августта Россияда жана Казакстанда жашаган Кыргызстандын жарандары менен онлайн жолугушуу болгон. 19-26-августтарда АКШда, Европа өлкөлөрүндө, Азия жана Жакынкы Чыгыш өлкөлөрүндө жашашкан мекендештер менен онлайн жолугушуулар болмокчу. COVID-19 коронавирус пандемиясынан улам жарандардын ден соолугун коргоо максатында иш-чаралар онлайн режимде өтүүдө.
Мындай жолугушуулардын башкы максаты – ар бир кыргызстандыктын конституциялык укугун ишке ашырып шайлоо процессине катышуусу, шайлоо процессинин ачыктыгы менен аныктыгын камсыз кылуу.
12-августта болуп өткөн жолугушууда чет өлкөлөрдө жашашкан кыргызстандыктар шайлоо процессин уюштуруу маселелери, шайлоочулардын тизмесине кошуу мүмкүнчүлүктөрү, консулдук каттоого туруу, биометрикалык маалыматтарды тапшыруу жана башка маселелерге кызыгууларын билдиришти.
БШК төрайымы Н. Шайлдабекова тарабынан кенен-кесири жооптор берилди. Ошону менен бирге чет өлкөлөрдө жашаган Кыргызстандын жарандары үчүн төмөнкү маанилүү жагдайлар белгиленди:
- “КР ЖК депутаттарын жана Президентин шайлоо жөнүндөгү” конституциялык мыйзамга ылайык, чет өлкөлөрдөгү шайлоо участоктору КР дипломатиялык өкүлчүлүктөрүнүн жана консулдук мекемелеринин, ошондой эле КР мамлекеттик органдарынын өкүлчүлүктөрүнүн территорияларында ачылышы мүмкүн. 2020-жылдын 4-октябрында өтө турган ЖК депутаттарын шайлоого карата чет өлкөлөрдө түзүлгөн шайлоо участокторунун жалпы саны 44 (кырк төрт). Биринчи жолу Иркутск, Сургут, Южно-Сахалинск жана Якутск шаарларында КР Россиядагы элчилигинин канцеляриясы негизделгендиктен, бул шаарларда шайлоо участоктору ачылды. Ошондой эле биринчи жолу шайлоо участоктору Париж, Рим шаарларында түзүлдү.
- КРдин жарандык жөнүндөгү мыйзамына ылайык, КР жарандыгынан кабыл алынган тартип боюнча чыгууну аткарбаган жаран да Кыргыз Республикасы үчүн КР жараны болуп кала берет жана шайлоо укугуна ээ болот.
- “КР ЖК депутаттарын жана Президентин шайлоо жөнүндөгү” конституциялык мыйзам боюнча, биометрикалык маалыматтарын тапшырган жана КРдин жакынкы дипломатиялык өкүлчүлүгүндө же консулдук мекемесинде консулдук каттоодо турган жарандар, тиешелүү участоктордогу шайлоочулардын тизмесине автоматтык түрдө кошулат.https://shailoo.gov.kg/ru/konstitucionnye-zakony-kr/konstitucionnye-zakony-kr/O_vyborah_Pr-1913/
- Консулдук каттоого туруу үчүн чет өлкөдөгү мекемеге жеке өзү келип документтер пакетин тапшыруусу, же болбосо Кыргыз Республикасынын чет өлкөдөгү мекемесинин расмий электрондук дарегине сканерленген документтерди салуу же КР ТИМдин https://mfa.gov.kg порталындагы «Консулдук каттоо” электрондук маалыматтык системасы аркылуу жөнөтүү зарыл.
- Жарандардын шайлоочулардын тизмесине кошулушу боюнча маалыматты мамлекеттик «Тизме» http://www.tizme.gov.kg порталынан тактап билүүгө же шайлоолордун убагында Кыргыз Республикасынын дипломатиялык өкүлчүлүктөрүнүн, консулдук мекемелеринин территорияларындагы шайлоо участокторунан билүүгө болот.
