2017-жылдын  8-сентябрындагы   КР  БШКнын жыйынында талапкер Р.Карасартованы   каттоодон  баш  тартуу  маселеси  каралды.
2017-жылдын 27-июлунда Кыргыз Республикасынын шайлоо жана референдумду өткөрүү боюнча борбордук комиссиясына  Кыргыз Республикасынын Президенти кызматына өзүн өзү талапкер катары көрсөткөн Кыргыз Республикасынын жараны Р.Карасартовадан арыз түшкөн.  
2017-жылдын 25-августунда Кыргыз Республикасынын Президенти кызматына  талапкер Р.Карасартова   КР БШКга анын талапкерлигин колдогон шайлоочулардын 31 706  кол тамгасын тапшырган.
Кол коюлган барактарды текшерүүнүн жыйынтыгы боюнча Кыргыз Республикасынын Президенти кызматына талапкер Р.Карасартованы колдогон шайлоочулардын 31 706 колунун ичинен  4 680 кол тамгасы ишенимдүү эмес, 27 026  кол тамга анык деп табылды.
Кыргыз Республикасынын Конституциясынын 62-беренесине жана конституциялык Мыйзамдын 49-беренесинин 1 бөлүмүнө ылайык, Президенттикке талапкер шайлоочулардын 30 миңден кем эмес кол тамгаларын чогулткан учурда катталышы мүмкүн. Конституциялык Мыйзамдын 53-беренесинин 7-бөлүмүнө ылайык, тиешелүү документтер тапшырылбаган учурда, талапкерди каттоодон баш тартууга негиз болот.
КР “Кыргыз Республикасынын Президентин жана КР Жогорку Кеңешинин депутаттарын шайлоо жөнүндө” Кыргыз Республикасынын конституциялык мыйзамында көрсөтүлгөн талаптарды аткарбагандыгына байланыштуу, 2017-жылдын 8-сентябрындагы КР БШКнын №423-Токтому менен   Р.Карасартованы  Кыргыз Республикасынын Президенти кызматына талапкер катары каттоодон баш тартылды.
Ошондой эле, Кыргыз Республикасынын Президенти кызматына талапкер Р.Карасартованын  шайлоо жана каржы маселеси боюнча ыйгарым укуктуу өкүлдөрүнүн   укуктары токтотулду.
 

КР БШК аппаратынын маалыматтык бөлүмү