2017-жылдын 21-июлунда Кыргыз Республикасынын Президентинин алдындагы мамлекеттик тил боюнча Улуттук комиссия КР Президенти кызматына талапкерлер жана алардын ыйгарым укуктуу өкүлдөрү үчүн тааныштыруу жолугушуусун өткөрүп, мамлекеттик тилди билүү деңгээлин “Кыргызтест” тутуму боюнча аныктоонун тартиби менен тааныштырды.
Ошондой эле 2017-жылдын 25-июлунда КР Президенти кызматына талапкерлер, алардын ыйгарым укуктуу өкүлдөрү жана жалпыга маалымдоо каражаттары үчүн «Кыргызтест» тутумунун иштөөсүнүн расмий бет ачары өткөрүлөт.
2017-жылдын 17-июлунда мамлекеттик тил боюнча Улуттук комиссия өзүнүн буйругу менен “КР Өкмөтүнүн 2017-жылдын 13-июлундагы №430 токтомуна ылайык иштелип чыккан, Кыргыз Республикасынын Президенти кызматына талапкерлер үчүн мамлекеттик тилди билүүнүн деңгээлин аныктоо үчүн тесттен өткөрүүнүн тартиби тууралуу” Жобону бекиткенин эске салабыз.
Мамлекеттик тил боюнча Улуттук комиссиянын маалыматы боюнча 2017-жылдын 26-июлунда түзүлгөн графикке ылайык, мамлекет башчысынын кызматына талапкерлер үчүн мамлекеттик тилди билүү деңгээлин текшерүү үчүн тесттирлөө башталат.
Тутумга ылайык бардык шарттар эки этаптан, төрт субтесттен турат. Биринчи этапта талапкер каттоодон өтөт жана идентификациялык код алат, тестирлөөдөн өтүүнүн жол жобосу менен таанышат. Экинчи этапта талапкер тестирлөөдөн өтүп, жыйынтыгын алат.
KР Президенти кызматына талапкер же анын ыйгарым укуктуу өкүлү КР Борбордук шайлоо комиссиясына мамлекеттик тилди билүү деңгээлин аныктаган сертификатын (ортодон жогорку же В2) шайлоо күнүнө 45 календардык күн калгандан кечиктирбестен тапшыруусу керек.
Тестирлөө Бишкектин Фрунзе көчөсүнүн, №547-дарегинде (7200330) өтөт.
Кененирээк билем десеңиз ушул шилтемеге кирсиңиз: http://kyrgyztest.gov.kg/
