20-октябрда Кыргыз Республикасынын Борбордук шайлоо комиссиясы кезектеги жыйынында алдыдагы жергиликтүү кеңештеринин депутаттарын шайлоону өткөрүүгө байланыштуу маселелерди карады.

Күн тартиби коюлган “Кыргыз Республикасынын жергиликтүү кеңештеринин депутаттарын шайлоо боюнча шайлоо бюллетенине киргизүүнүн кезектүүлүгүн аныктоо боюнча катталган саясий партиялардын ортосунда чүчүкулак өткөрүүнүн тартиби жөнүндө” Нускама жана төмөнкү жоболор бекитилди:

  “Жергиликтүү кеңештердин депутаттарын шайлоону даярдоонун жана өткөрүүнүн жүрүшүндө маалымат алууга жана жайылтууга жарандардын укуктарынын кепилдиктери жана шайлоочуларга маалымдоо жөнүндө”, “Жергиликтүү кеңештердин депутаттарын шайлоону даярдоонун жана өткөрүүнүн жүрүшү жөнүндө шайлоочуларга жана шайлоонун башка катышуучуларына маалымдоо маселелери боюнча Жумушчу топ жөнүндө”, “Кыргыз Республикасынын жергиликтүү кеңештеринин депутаттарын шайлоону өткөрүүдө шайлоо алдындагы үгүт жүргүзүүнүн тартиби жөнүндө”,“Жергиликтүү кеңештердин депутаттарын шайлоону өткөрүүдө шайлоо алдындагы үгүт жүргүзүүнүн тартибин сактоону контролдоо боюнча тиешелүү шайлоо комиссиясынын Жумушчу тобу жөнүндө”, “Кыргыз Республикасынын жергиликтүү кеңештеринин депутаттарын шайлоону өткөрүүдө шайлоо бюллетендерин даярдоо, өткөрүп берүү жана сактоо тартиби жөнүндө”,“Кыргыз Республикасынын жергиликтүү кеңештеринин депутаттарын шайлоону өткөрүүдө шайлоочулардын жана шайлоонун башка катышуучуларынын арыздарын жана даттанууларын кароо боюнча Жумушчу топ жөнүндө”, “Кыргыз Республикасынын жергиликтүү кеңештеринин депутаттарын шайлоону өткөрүүдө шайлоо комиссияларында жарандардын шайлоо процессининин башка катышуучуларынын кайрылуулары менен иштөө жөнүндө”.

БШК төрагасы Н.К. Шайлдабекова шайлоо процесси жаңыдан башталганына карабастан, шайлоо мыйзамдарын бузууга жол берилип жатканын, ага байланыштуу тиешелүү чараларды көрүү зарылдыгын белгиледи. Жыйында “Кыргыз Республикасынын шайлоо жана референдум өткөрүү боюнча Борбордук комиссиясынын саясий партияларга, жергиликтүү жамааттардын жана  шайлоо комиссияларынын мүчөлөрүнө” Кайрылуу бир добуштан бекитилди. Анда БШК шайлоо алдындагы үгүт иштерин жүргүзүү укугун кыянат пайдаланууга жол берилбестигин эскертти. Ошентип, жергиликтүү кеңештердин депутаттарын шайлоого катышууну көздөгөн саясий партиялардын жана талапкерлердин Кыргыз Республикасынын Президентинин жергиликтүү кеңештердин депутаттарын шайлоону дайындоо жөнүндө Жарлыгы расмий түрдө жарыялангандан кийин илинген үгүт жана маалымат материалдары Кыргыз Республикасынын Борбордук шайлоо комиссиясынын ушул Кайрылуусу расмий кабыл алынгандан кийин 5 (беш) календардык күндүн ичинде алынууга же демонтаж кылынууга тийиш.

Мындан сырткары, БШК Момоконов Али-Аскар Асыпбековичти “Кыргызстан” саясий партиясынан Кыргыз Республикасынын Жогорку Кеңешинин депутаттыгына катталган талапкерлеринин тизмесинен чыгаруу жөнүндө чечим кабыл алды.

Жыйындан кийин БШК төрагасы Н.К. Шайлдабекова жана төраганын орун басары А.Г.Бекматов журналисттердин суроолоруна жооп беришти.                                    

КР БШК басма сөз кызматы