Н.А. Ташматовдун арызы жөнүндө

2023-жылдын 4-декабрында Лейлек аймактык шайлоо комиссиясынын №5 чечими менен Кулунду айылдык кеңешинин депутаты Н.А.Ташматовго карата соттун айыптоо өкүмү мыйзамдуу күчүнө киргендигине байланыштуу ыйгарым укуктары мөөнөтүнөн мурда токтотулган.

2023-жылдын 5-декабрында Н.А.Ташматов Кыргыз Республикасынын Шайлоо жана референдум өткөрүү боюнча борбордук комиссиясына (мындан ары - Борбордук шайлоо комиссиясы) Лейлек аймактык шайлоо комиссиясынын чечимине арыз менен кайрылган.

Н.А. Ташматов өзүнүн арызында 2023-жылдын 17-февралында Баткен облусунун Лейлек райондук сотунун өкүмү менен 100 000 сом айыпка тартылганын көрсөткөн. Н.А. Ташматов айып пул төлөнүп берилгендиктен, азыркы учурда анын соттуулугу жок деп эсептейт.

Ошол себептен, Н.А. Ташматов Лейлек айылдык кеңешинин депутаттык мандатын кайтарып берүүнү жана анын ыйгарым укуктарын мөөнөтүнөн мурда токтотуу жөнүндө Лейлек аймактык шайлоо комиссиясынын чечимин бекитүүдөн баш тартууну өтүнөт.

Берилген материалдарды жана арыздын жүйөлөрүн изилдеп чыгып, Борбордук шайлоо комиссиясы төмөнкүлөрдү белгилейт.

2021-жылдын 7-майындагы Лейлек аймактык шайлоо комиссиясынын №88 чечими менен Борбордук шайлоо комиссиясынын 2021-жылдын 1-майындагы №191 токтомунун негизинде Ташматов Нурланбек Авалбекович Баткен облусунун Лейлек районунун Кулунду айылдык кеңешинин депутаты болуп катталган.

Баткен облусунун Лейлек райондук сотунун 2023-жылдын 17-февралындагы (УД-02/23-Ба4) айыптоо өкүмү менен Н.А. Ташматов Кыргыз Республикасынын Кылмыш-жаза кодексинин 348-беренесинин
1-бөлүгү менен күнөөлүү деп табылып, 1000 эсептик көрсөткүчтүн  өлчөмүндө (100 000 сом) айыпка тартылган.

2023-жылдын 17-февралында Баткен облусунун Лейлек райондук сотунун Н.А.Ташматовго карата айыптоо өкүмү мыйзамдуу күчүнө киргендигине байланыштуу Лейлек аймактык шайлоо комиссиясынын №5 чечими менен Н.А.Ташматовдун ыйгарым укуктары мөөнөтүнөн мурда токтотулган.

«Жергиликтүү кеңештердин депутаттарынын статусу жөнүндө» Кыргыз Республикасынын Мыйзамынын 3-беренесинин 1-бөлүгүнүн 9-пунктуна, 2-бөлүгүнө ылайык, жергиликтүү кеңештин депутатынын ыйгарым укуктарын мөөнөтүнөн мурда токтотуу үчүн ага карата соттун айыптоо өкүмүнүн мыйзамдуу күчүнө кириши негиз болуп саналат, «Ушул берененин 1-бөлүгүндө көрсөтүлгөн негиздер боюнча депутаттын ыйгарым укуктарын мөөнөтүнөн мурда токтотуу негиз келип чыккан күндөн тартып тиешелүү аймактык шайлоо комиссиясы 30 календарлык күндөн кечиктирбестен кабыл алган чечим менен жүзөгө ашырылат».

Жогорудагы Мыйзамдын талаптарынын негизинде, Борбордук шайлоо комиссиясы Н.А.Ташматовдун арызындагы талаптарды канааттандыруудан баш тартылсын деген тыянакка келет.

Лейлек аймактык шайлоо комиссиясынын 2023-жылдын 4-декабрындагы № 5 чечими «Кыргыз Республикасынын Шайлоо жана референдум өткөрүү боюнча шайлоо комиссиялары жөнүндө» Кыргыз Республикасынын Мыйзамынын 20-беренесинин, «Жергиликтүү кеңештердин депутаттарынын статусу жөнүндө» Кыргыз Республикасынын Мыйзамдын 3-беренесинин, «Жергиликтүү кеңештердин депутаттарын шайлоо жөнүндө» Кыргыз Республикасынын Мыйзамынын 52-беренесинин ченемдерине ылайык келет.

«Кыргыз Республикасынын Шайлоо жана референдум өткөрүү боюнча борбордук комиссиясы жөнүндө» Кыргыз Республикасынын конститутциялык Мыйзамынын 3, 4, 8-беренелерин жетекчиликке алып,

Кыргыз Республикасынын Шайлоо жана референдум өткөрүү боюнча борбордук комиссиясы

ЧЕЧИМ КЫЛАТ:

1. Н.А.Ташматовдун арызы боюнча талаптарды канаатандыруудан баш тартылсын.

2.  Бул чечим Кыргыз Республикасынын Шайлоо жана референдум өткөрүү боюнча борбордук комиссиясынын расмий сайтына жарыялансын.

3. Бул чечимдин аткарылышын контролдоо Кыргыз Республикасынын Шайлоо жана референдум өткөрүү боюнча борбордук комиссиясынын төрагасынын орун басары Т.У. Шайназаровго жүктөлсүн.

ТӨРАГА                                                                   Н. ШАЙЛДАБЕКОВА

Бишкек ш., 2023-жылдын 26-декабры

№ 225