КР БШКнын тѳрагасы Н. Шайлдабекова башында турган, БШК мүчѳсү А. Кубатбеков, БШК аппаратынын кызматкери баш болгон Кыргыз Республикасынын Борбордук шайлоо комиссиясынын делегациясы Корея Республикасынын 22-чакырылыштагы Улуттук жыйынынын депутаттарын шайлоого мониторингге катышууда.

Мониторингге 27 өлкөнүн (Кыргызстан, Казакстан, Өзбекстан, Армения, Монголия, Мальдив аралдары, Непал, Пакистан, Мексика, Африка өлкөлөрү ж.б.) шайлоо органдарынын жетекчилери жана мүчөлөрү, шайлоо органдарынын аймактык бирикмелеринин жана эл аралык уюмдардын өкүлдөрү катышууда.

Шайлоонун алдында Кыргыз Республикасынын Борбордук шайлоо комиссиясынын делегациясы менен Корея Республикасынын Улуттук шайлоо комиссиясынын төрагасы Ро Тхэ-Актын жолугушуусу болуп өттү. Жолугушууда эки өлкөнүн шайлоо органдарынын кызматташуусу жана шайлоону уюштуруу боюнча тажрыйба алмашуу маселелери талкууланды.

Кыргыз Республикасынын Шайлоо жана референдум өткөрүү боюнча борбордук комиссиясынын делегациясы Кореянын Борбордук шайлоо комиссиясына караштуу Кореянын Жарандык билим берүү борборуна барды, Борбор жарандарды шайлоо маселеси боюнча кеңири маалымдоо жана окутуу программасын ишке ашырат. Кореянын Борбордук шайлоо комиссиясына караштуу Жарандык билим берүү борбору мектеп окуучулары, студенттер, шайлоого биринчи жолу катышып жаткан жаштар үчүн курстарды, ошондой эле болочок талапкерлер үчүн саясий лидерлик курстарын жана башкалар үчүн курстарды өткөрөт. Жарандык билим берүү борбору 1992-жылы түзүлгөн жана Кореяда демократиянын жана адам укуктарынын баалуулуктарын жайылтууга кѳмѳктѳшкѳн белгилүү институтка айланган.

КР БШК Кореянын Борбордук шайлоо комиссиясына караштуу жарандык билим берүү боюнча ушундай борбордун методологиясын иликтеп үйрѳнүүгѳ кызыкдар экенин билдирди.

Кореянын Борбордук шайлоо комиссиясынын өкүлдөрү Кыргызстандын шайлоо системасынын түрдүү аспектилерин өнүктүрүүгө колдоо көрсөтүүгө даяр экендиктерин билдиришти.

КР БШКнын делегациясы ошондой эле шайлоодо колдонулуп жаткан технологиялар, бюллетендерди эсептѳѳ үчүн жабдуулар жана башкалар менен таанышты. Кореянын Борбордук шайлоо комиссиясынын өкүлдөрү добуш берүүнүн жыйынтыктарын чагылдыруу жана пайда болгон кырдаалдарга жооп берүү боюнча кырдаал борборунун ишинин уюштурулушунун даярдыгын көрсөтүштү.

Ошондой эле КР БШКнын делегациясы кореялык шайлоо жабдууларын өндүрүүчүлөр менен жолугушуп, анда идентификациялык жабдууларды модернизациялоо жана башкаруунун автоматташтырылган системаларын жаңылоо маселелери талкууланды.

8-апрелде Эл аралык байкоолор программасынын алкагында КР БШК Сеулдагы “Заманбап демократиянын кризиси жана чакырыктары: тез өзгөрүүлөрдүн доорунда жаңы жолду түзүү” аттуу глобалдык шайлоо форумуна катышты. Форумда дүйнөдөгү шайлоонун саясий поляризациясы, жасалма интеллекттин шайлоого тийгизген таасири, шайлоону башкарууда жана саясий партиялардын, талапкерлердин үгүт иштеринде жасалма интеллект алып келе турган мүмкүнчүлүктөр жана тобокелдиктер талкууланды.

Шайлоо күнү, 10-апрелде КР БШК делегациясы Сеул шаарындагы бир катар шайлоо участкаларында болуп, добуш берүүнүн жүрүшүнө байкоо жүргүздү. Делегациянын мүчөлөрү шайлоочулар, шайлоо органдарынын өкүлдөрү жана жергиликтүү байкоочулар менен сүйлөшүү мүмкүнчүлүгүнө ээ болушту.

Корея Республикасынын Улуттук Ассамблеясы Корея Республикасынын бир палаталуу мыйзам чыгаруу органы болуп саналат.

Улуттук ассамблея 4 жылдык мөөнөткө шайланган 300 депутаттан турат. Алардын ичинен 254 депутат бир мандаттуу округдар боюнча, 46 депутат пропорционалдык система боюнча шайланат.

Шайлоочулардын саны 44 миллиондон ашык адамды түзѳт.

14592 шайлоо участогу, Корея Республикасынын аймагынан тышкары жерлерде 220 шайлоо участогу түзүлгөн.

Парламенттик шайлоого 38 саясий партия катышууда.