Кыргыз Республикасынын Шайлоо жана референдум өткөрүү боюнча борбордук комиссиясынын делегациясы эки тараптуу кызматташуунун алкагында бүгүн, 2023-жылдын 5-ноябрында, Молдова Республикасында өтүп жаткан жалпы жергиликтүү кеңештерге шайлоого байкоо жүргүзүүгө катышууда.

Кыргызстандык делегациянын курамында КР Борбордук шайлоо комиссиясынын мүчөсү А.Жупуева жана КР БШК аппаратынын кызматкери М.Сарымсаков бар.

Байкоочулар жана жалпыга маалымдоо каражаттарынын өкүлдөрү шайлоо тилкелерин кыдырып, добуш берүүнүн жүрүшүнө көз салып, добуштарды саноого байкоо жүргүзүүгө катышат.

Кошумчалай кетсек, 4-ноябрда эл аралык байкоочулар үчүн брифинг болуп, анда Молдова Республикасынын Борбордук шайлоо комиссиясынын төрагасы Анжелика Караман шайлоого даярдыктын жүрүшү тууралуу маалымат берип, мыйзамдардагы негизги өзгөртүүлөр жана жергиликтүү мамлекеттик бийлик органдарын (примарлар жана жергиликтүү кеңешчилер) шайлоо тартиби тууралуу айтып берди.

Брифингке чет мамлекеттердин, анын ичинде Кыргызстандын шайлоо органдарынын, эл аралык байкоочу миссиялардын өкүлдөрү катышты.

Маалымат үчүн:

2023-жылдын 1-январынан тартып Молдова Республикасынын Борбордук шайлоо комиссиясы өз ишин жаңы шайлоо кодексинин негизинде жүргүзө баштады. Шайлоо мыйзамдарындагы өзгөртүүдөн кийин уюштурулган биринчи шайлоо 2023-жылдын 5-ноябрына белгиленген жалпы жергиликтүү шайлоолор болду. Молдова Республикасында жалпы жергиликтүү шайлоолор 4 жылда бир жолу өткөрүлөт.

2023-жылдын 5-ноябрындагы жалпы жергиликтүү шайлоодо 898 примар жана 11 058 жергиликтүү кеңешчи шайланат, анын ичинен 9 972 айылдык (коммуналдык), шаардык, муниципалдык кеңешчилер жана 1 086 райондук кеңешчилер/ Кишинев жана Балти муниципалитеттеринин кеңешчилери.

Кыргыз Республикасынын Борбордук шайлоо комиссиясынын маалымат бөлүмү