Бишкек аймактык шайлоо комиссиясынын 2024-жылдын 16-ноябрындагы №40/6 чечимине Б.Т. Абдыкеримовдун арызы жѳнүндѳ

2024-жылдын 17-ноябрында Кыргыз Республикасынын Шайлоо жана референдум өткөрүү боюнча борбордук комиссиясына (мындан ары - БШК) Б.Т. Абдыкеримовдон "Жаңы күч – Новая сила" саясий партиясына карата Бишкек аймактык шайлоо комиссиясынын 2024-жылдын 16-ноябрындагы № 40/6 чечимине арыз келип түшкөн.

Арыз ээси Кыргыз Республикасынын Улуттук тарых музейинде “Жаңы күч – Новая сила” саясий партиясы Кыргыз Республикасынын Улуттук тарых музейинин аймагында (жанында) Манас эстелигинин жанында үгүт иш-чарасын өткөргөнүн жана  аны социалдык тармактарга чыгарганын кѳсѳтѳт.

Арыз ээси үгүт иштерин жүргүзүүнүн эрежелерин жана тартибин бузуу фактысы боюнча текшерүү жүргүзүүнү жана мыйзамга ылайык “Жаңы күч – Новая сила” саясий партиясын жоопко тартууну өтүнөт.

2024-жылдын 17-ноябрында Борбордук шайлоо комиссиясынын отуруму болуп, ага Бишкек аймактык шайлоо комиссиясынын төрагасы Б.А. Конуров жана арыздануучу – Б.Т. Абдыкеримов чакырылып, алардын билдирүүсү угулду.

БШК арызды карап чыгып, ошондой эле тараптардын пикирин угуп, төмөнкүдөй жыйынтыкка келет:

“Жергиликтүү кеңештердин депутаттарын шайлоо жөнүндө” Кыргыз Республикасынын Мыйзамынын 27-беренесинин 4-пунктуна ылайык “Көрсөтүлгөн материалдарды эстеликтерге, обелисктерге, тарыхый, маданий же архитектуралык баалуулугу бар имараттарга, ошондой эле шайлоо комиссияларынын жайларына, аларга кире берген жерлерге жана добуш берүүчү жайларга жайгаштырууга тыюу салынат. Үгүт материалдарын жайгаштыруу максатында жашыл бадалдарды, дарактарды пайдаланууга жол берилбейт”.

Бишкек аймактык шайлоо комиссиясынын төрагасы Б.Коңуров Бишкек аймактык шайлоо комиссиясынын отурумунда «Жаңы күч – новая сила» партиясынын ыйгарым укуктуу өкүлү аталган материалдар Улуттук тарых музейинин имаратында жайгаштырылбаганын, ал эми ѳткѳрүлгѳн иш-чара маалымдоо мүнөзүндѳ болгонун жана жогоруда аталган укуктук ченемдерди бузбаганын билдиргенин баяндады.

Ушуга байланыштуу БШК “Жаңы күч – Новая сила” саясий партиясынын аракеттеринде шайлоо алдындагы үгүт иштерин жүргүзүүнүн эрежесин жана тартибин бузуунун белгилери жок деп эсептейт. 

Жогоруда баяндалгандардын негизинде, “Кыргыз Республикасынын Шайлоо жана референдум өткөрүү боюнча борбордук комиссиясы жөнүндө” Кыргыз Республикасынын конституциялык Мыйзамынын 3, 4, 8-беренелерин, “Жергиликтүү кеңештердин депутаттарын шайлоо жөнүндө” Кыргыз Республикасынын Мыйзамынын 42-беренесин жетекчиликке алып, Кыргыз Республикасынын Шайлоо жана референдум өткөрүү боюнча борбордук комиссиясынын 2017-жылдын 7-июлундагы № 212 токтому менен бекитилген «Кыргыз Республикасында шайлоону жана референдумдарды өткөрүүдө шайлоочулардын жана шайлоо процессинин башка субъекттеринин (катышуучуларынын) арыздарын (даттанууларын) шайлоо комиссияларынын кароосунун тартиби жөнүндө» жобого ылайык,

Кыргыз Республикасынын Шайлоо жана референдум өткөрүү боюнча борбордук комиссиясы

ЧЕЧИМ  КЫЛАТ:

1. Б.Т. Абдыкеримовдун арызын канааттандыруудан баш тартылсын.

2. Бишкек аймактык шайлоо комиссиясынын 2024-жылдын 16-ноябрындагы №40/6 чечими күчүндѳ калтырылсын

3. Ушул чечим Кыргыз Республикасынын Шайлоо жана референдум өткөрүү боюнча борбордук комиссиясынын расмий сайтына жарыялансын.

4. Ушул чечимдин аткарылышын контролдоо Кыргыз Республикасынын Шайлоо жана референдум өткөрүү боюнча борбордук комиссиясынын мүчөсү, шайлоочулардын жана шайлоо процессинин башка катышуучуларынын арыздарын жана даттанууларын кароо, маалымдоо маселелери жана үгүт эрежелери боюнча жумушчу топтун жетекчиси У.К. Жылкыбаевге жүктѳлсүн.

ТѲРАГА                                                                  Н. ШАЙЛДАБЕКОВА

Бишкек ш., 2024-жылдын 17-ноябры

№ 302