№7 Ош шайлоо округу боюнча

Кыргыз Республикасынын Жогорку Кеңешинин депутаттыгына талапкер Арзибаев Бекболот Осконбаевичке карата

сотко чейинки өндүрүш боюнча УКМКнын Ош шаары жана Ош облусу боюнча ББнын маалыматы тууралуу

2021-жылы 27-ноябрда Кыргыз Республикасынын Шайлоо жана референдум өткөрүү боюнча борбордук комиссиясынын (мындан ары – Борбордук шайлоо комиссиясы) Ыкчам чара көрүүнүн координациялык тобуна (мындан ары – ЫЧКТ) №03-821-2021-000355 сотко чейинки өндүрүш боюнча УКМКнын Ош шаары жана Ош облусу боюнча ББнын маалыматы түштү.

Берилген маалыматка ылайык, 2021-жылы 18-ноябрда УКМКнын Ош шаары жана Ош облусу боюнча ББ тарабынан №7 Ош шайлоо округу боюнча Кыргыз Республикасынын Жогорку Кеңешинин депутаттыгына талапкер Б. Арзибаев Ош шаарынын Жапалак айылында жайгашкан шайлоо алдындагы штабда өз агитаторлоруна жана ишенимдүү адамдарына акча каражаттарын төлөө жолу менен шайлоочулардын добуштарын сатып алууну жүзөгө ашырып жаткандыгы тууралуу маалымат алган.

2021-жылы 25-ноябрда сотко чейинки өндүрүш алкагында процесстик амалдар жасалган, анын жүрүшүндө Б. Арзибаев агитаторлоруна жана ишенимдүү адамдарына 500 000 сом суммасында накталай акча каражаттарын шайлоо фондунан тышкары төлөө жолу менен шайлоо өнөктүгүн каржылоо тартибин бузгандыгын мойнуна алган, бул үчүн Кыргыз Республикасынын Жазык кодексинин 193-беренесинде жазык жоопкерчилиги каралган (шайлоо өнөктүгүн каржылоо тартибин бузуу).

2021-жылы 26-ноябрда сотко чейинки өндүрүш тергөөгө караштуулугу боюнча Ош шаарынын ИИБге берилген, териштирүү улантылууда.

УКМКнын Ош шаары жана Ош облусу боюнча ББ тарабынан берилген маалыматтарды жана материалдарды изилдеп жана талкуулап, Борбордук шайлоо комиссиясы төмөнкүдөй тыянакка келди.

«Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө» Кыргыз Республикасынын конституциялык Мыйзамынын (мындан ары –конституциялык Мыйзам) 22-беренесинин 11-бөлүгүнө ылайык, «шайлоо өнөктүгүнүн мезгилинде Кыргыз Республикасынын жарандары, саясий партиялар каржылоону талап кылган шайлоо алдындагы үгүт иштерин талапкерлер, талапкерлердин тизмесин көрсөткөн саясий партиялар менен макулдашуу боюнча гана жана алардын шайлоо фонддору аркылуу жүргүзүүгө укуктуу».

Конституциялык Мыйзамдын 41-беренесинин 11-бөлүгүнө ылайык, «талапкерлерге, саясий партияларга шайлоочулардын колун чогултууга, шайлоо алдындагы үгүт жүргүзүүгө, башка шайлоо алдындагы иш чараларды жүзөгө ашырууга өздөрүнүн шайлоо фонддоруна келип түшкөн каражаттардан тышкары акча каражаттарын пайдаланууга тыюу салынат».

Мында конституциялык Мыйзамдын 41-беренесинин 14-бөлүгүнүн үчүнчү абзацында минтип белгиленген: «Шайлоо өнөктүгүн өткөрүү менен байланышкан иштерди (кызмат көрсөтүүлөрдү) аткаруу (берүү) үчүн талапкердин, саясий партиянын жана жеке, юридикалык жактардын ортосундагы эсептешүүлөр накталай эмес тартипте гана жүзөгө ашырылат».

Жогоруда баяндалганга байланыштуу Борбордук шайлоо комиссиясы талапкер Б. Арзибаевдин шайлоо мыйзамдарында каралган жоопкерчилиги жөнүндө маселени сотко чейинки өндүрүштө териштирүү натыйжалары боюнча кароо зарылдыгы тууралуу тыянакка келет.

Жогоруда баяндалгандардын негизинде, «Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө» Кыргыз Республикасынын конституциялык Мыйзамынын 22, 28, 41, 43-беренелерине ылайык, «Кыргыз Республикасынын Шайлоо жана референдум өткөрүү боюнча борбордук комиссиясы жөнүндө» Кыргыз Республикасынын конституциялык Мыйзамынын 3, 4, 8-беренелерин, Кыргыз Республикасынын Шайлоо жана референдум өткөрүү боюнча борбордук комиссиясынын 2020-жылдын 4-февралындагы №33 токтому менен бекитилген «Ыкчам чара көрүүнүн координациялык тобунун (ЫЧКТ) ишинин тартиби жөнүндө» Жобону жетекчиликке алып, Кыргыз Республикасынын Шайлоо жана референдум өткөрүү боюнча борбордук комиссиясы

ЧЕЧИМ КЫЛАТ:

1. №03-821-2021-000355 сотко чейинки өндүрүш боюнча УКМКнын Ош шаары жана Ош облусу боюнча ББ тарабынан берилген маалымат эске алынсын.

2. Териштирүү органы шайлоо өнөктүгүн каржылоо тартибин бузуу фактысын аныктаса, Кыргыз Республикасынын Жогорку Кеңешинин депутаттыгына №7 Ош шайлоо округу боюнча талапкер Арзибаев Бекболот Осконбаевичти шайлоо мыйзамдарында каралган жоопкерчиликке тартуу жөнүндө маселе каралсын.

3. Ош шаарынын ИИБи №03-821-2021-000355 сотко чейинки өндүрүштө териштирүү натыйжалары боюнча Кыргыз Республикасынын Шайлоо жана референдум өткөрүү боюнча борбордук комиссиясына толук маалымат берсин.

4. Бул чечим Кыргыз Республикасынын Шайлоо жана референдум өткөрүү боюнча борбордук комиссиясынын расмий сайтына жарыялансын.

5. Бул чечимдин аткарылышын контролдоо Кыргыз Республикасынын Шайлоо жана референдум өткөрүү боюнча борбордук комиссиясынын төрагасынын орун басары, Ыкчам чара көрүүнүн координациялык тобунун жетекчиси Т. Шайназаровго жүктөлсүн.

ТӨРАГА Н. ШАЙЛДАБЕКОВА

Бишкек ш., 2021-жылдын 27-ноябры

№1401