2024-жылдын 5-июлунда Кыргыз Республикасынын шайлоо жана референдум өткөрүү боюнча борбордук комиссиянын (мындан ары - БШК) жыйынтыктоочу жыйынында шайлоо мыйзамдарын бузуу фактылары боюнча укук коргоо органдары тарабынан көрүлгөн чаралар жөнүндө Ыкчам чара кѳрүү координациялык тобунун (мындан ары – ЫЧКТ) маалыматы, ошондой эле №5 Ноокат бир мандаттуу шайлоо округу боюнча Кыргыз Республикасынын Жогорку Кеңешинин депутатын мөөнөтүнөн мурда шайлоону даярдоонун жана өткөрүүнүн жүрүшүндө БШКга келип түшкөн бузуулар боюнча Арыздарды жана даттанууларды кароо, маалымат маселелери жана үгүт тартиби боюнча жумушчу топтун маалыматы угулду.

Жыйынга укук коргоо органдарынын жана прокуратура органдарынын өкүлдөрү: Ош облусунун прокурорунун орун басары А.Т.Сегизбаев, Ноокат районунун прокурорунун орун басары Р.А.Жумабаев, Ноокат районунун ички иштер бөлүмүнүн башчысынын орун басары А.Т.Айдарканов, ошондой эле № 5 Ноокат округу боюнча Кыргыз Республикасынын Жогорку Кеңешинин депутаттыгына талапкерлер К.О.Кыланов, А.Т.Абдивалиев, Э.А.Кудайбердиев, К.А.Абдыкеримов, талапкер Э.А.Кудайбериевдин ыйгарым укуктуу өкүлү Т.Ажыматов жана Ноокат ОШКнын төрагасы В.М.Гиниятулина катышты.

Шайлоо процессин уюштуруу бөлүмүнүн башчысы Т.О. Айтикеевдин маалыматы угулду, №5 Ноокат шайлоо округу боюнча Кыргыз Республикасынын Жогорку Кеңешинин депутаттыгына талапкерлер тобунун билдирүүсүнө ылайык, Борбордук шайлоо комиссиясынын 2024-жылдын 3-июлундагы №242 чечими менен №5385, №5401, №5452, №5400, №5380 шайлоо участкаларында добуштарды кайра эсептѳѳ жөнүндө чечим кабыл алынган.

Т.О.Айтикеев БШКнын мүчөсү М.Д.Наспековдун катышуусунда 2024-жылдын 4-июлунда жогоруда аталган шайлоо участкаларында добуштарды кайра саноо жүргүзүлгөнүн билдирди.

№5 Ноокат округу боюнча Кыргыз Республикасынын Жогорку Кеңешинин депутаттыгына талапкер К.О.Кыланов ага участкалык шайлоо комиссияларында добуштарды кайра саноонун тартиби жана шарттары түшүндүрүлгөнүн билдирди. Ал ошондой эле добуштарды кайра саноонун жыйынтыгы менен макул экенин жана эч кандай дооматы жок экенин билдирди.

Ноокат ОШК төрагасы В.М.Гиниятулина участкалык шайлоо комиссияларынын добуштарын кайра саноонун протоколдорунун маалыматтары боюнча көрсөтүлгөн шайлоо участкаларында добуш берүүнүн жыйынтыктары жана натыйжалары өзгөрбөгөндүгү жөнүндө билдирди. Буга байланыштуу 2024-жылдын 4-июлунда Ноокат округдук шайлоо комиссиясы №5385, №5401, №5452, №5400, №5380 шайлоо участкаларында добуштарды кайра саноонун жыйынтыгы тууралуу протоколдорду эске алуу менен, №5 Ноокат бир мандаттуу шайлоо округу боюнча шайлоонун жыйынтыгын чыгарды.

№5 Ноокат округунда шайлоону даярдоонун жана ѳткѳрүүнүн жүрүшүндѳ келип түшкѳн шайлоо мыйзамдарын бузуулар боюнча Арыздарды жана даттанууларды кароо, маалымат маселелери жана үгүт эрежелери боюнча Жумушчу топ тарабынан көрүлгөн чаралар жөнүндө Борбордук шайлоо комиссиясынын төрагасы Н.К.Шайлдабекованын маалыматы угулду.

№5 Ноокат бир мандаттуу шайлоо округу боюнча жалпысынан шайлоо мыйзамдарын бузуу боюнча 26 билдирүүлөр келип түшкөн.

БШК жана ОШК тарабынан мыйзам бузуулар боюнча көрүлгөн чаралар:

- №5 Ноокат округу боюнча 47500 сом жалпы суммадагы айып пул түрүндө эскертүү берилген - шайлоо процессинин 6 катышуучусу;

- 5 даттануу жана кайрылуу боюнча арыз канааттандыруусуз калтырылган;

- 1 арыздын негизинде талапкерге эскертүү берилди;

- №5 Ноокат округу боюнча Кыргыз Республикасынын Жогорку Кеңешинин депутаттыгына талапкерлер А.Абдивалиевдин, С.Төлөнбаевдин, К.Кылановдун, Э.Кудайбердиевдин жана Б.Ажыгуловдун 1 жамааттык арызы боюнча №5385, №5401, №5452, №5400, №5380 УШКларда добуштарды кайра саноо жүргүзүлгөн.

№5 Ноокат округу боюнча шайлоону даярдоодо жана өткөрүүдө шайлоо мыйзамдарын бузуу фактылары боюнча укук коргоо органдары тарабынан көрүлүп жаткан чаралар жөнүндө Кыргыз Республикасынын Ички иштер министрлигинин Тергөө кызматынын бөлүм башчысы С.Б.Макиловдун маалыматы угулду.

С.Б.Макилов №5 Ноокат округу боюнча ЭЖУИге 46 материал катталганын билдирди, анын ичинен:

- добуштарды сатып алуу боюнча 13 материал;

- шайлоо алдындагы үгүт жүргүзүүнүн шарттарын бузуу жөнүндө
20 материал;

- административдик ресурсту кыянаттык менен пайдалануу боюнча
4 материал;

- добуш берүү укугун ишке ашырууга тоскоолдук кылуу боюнча
9 материал.

46 материалдын ичинен №5 Ноокат округу боюнча тѳмѳндѳгү Кыргыз Республикасынын Жогорку Кеңешинин депутаттыгына талапкерлер текшерилди:

- талапкер Б. Марипов боюнча 21 материал тууралуу.

- талапкер К. Кыланов боюнча 2 материал тууралуу.

- талапкер Б. Ажыкулов боюнча 1 материал тууралуу.

- талапкер А. Абдивалиев боюнча 6 материалтууралуу.

Ноокат районунун ИИБнин тергөө кызматы тарабынан жүргүзүлгөн тергөөгө чейинки текшерүүнүн жыйынтыгы менен бардык 46 материал боюнча КР Кылмыш-жаза процессуалдык кодексинин 27-беренесинин 1-бөлүгүнүн 2-пунктунун негизинде «кылмыш курамынын жоктугуна байланыштуу» кылмыш ишин козгоодон баш тартылган. Ошондой эле, Ноокат райондук прокуратурасы тарабынан чыгарылган чечимдер мыйзамдуу жана негиздүү деп табылган.

№5 Ноокат округу боюнча Кыргыз Республикасынын Жогорку Кеңешинин депутаттыгына талапкер Э.А.Кудайбердиев З. Сулайманкулованын арызы текшерүүнүн кайсы стадиясында экенин жана арыз боюнча кандай чаралар көрүлгөндүгүн сурады.

Ноокат районунун ички иштер бөлүмүнүн башчысынын орун басары А.Т.Айдарканов 2024-жылдын 30-июнунда З.Сулайманкулованын арызы боюнча маалымат ЭЖУИде №02-040-2024-001367 менен катталгандыгын билдирген.

ЭЖУИ №02-040-2024-001367 материалдарынын негизинде Ноокат районунун ИИБнин Тергөө кызматы тарабынан жүргүзүлгөн тергөөгө чейинки текшерүүнүн жыйынтыгында Кыргыз Республикасынын Кылмыш-жаза процессуалдык кодексинин 27-беренесинин 1-бөлүгүнүн 2-пунктунун негизинде «кылмыш курамынын жок болгондугуна» байланыштуу кылмыш ишин козгоодон баш тартылган.

Ноокат районунун прокурорунун орун басары Р.А.Жумабаев №02-040-2024-001367 ЭЖУИ материалдарынын негизинде прокуратура текшергенин билдирди, жыйынтыгы боюнча тергөө органынын чечими мыйзамдуу жана негиздүү деп табылган. Ошондой эле, Ноокат районунун прокуратурасы тарабынан тергөө органдарынын бардык 46 токтому текшерилген, жыйынтыгында чечимдер мыйзамдуу жана негиздүү деп таанылган.

Мындан тышкары, Ноокат районунун прокуратурасы тарабынан КК ЖоКтун 437-беренесинин 2-бөлүгү менен (Административдик ресурсту кыянаттык менен пайдалануу) Кызыл-Кыштак маданият үйүнүн директору Ж.Айтиевге карата 200 эсептик көрсөткүч (20 000 сом) өлчөмүндө айып салуу жөнүндө №01-01-040-01-8-000150 административдик протокол түзүлгөн.

Укук коргоо органдарынан жана прокуратура органдарынан алынган маалыматка караганда, бардык келип түшкөн арыздар, даттануулар жана билдирүүлөр каралып, алар боюнча Кыргыз Республикасынын мыйзамдарына ылайык чечимдер кабыл алынган. Добуш берүүнүн жыйынтыктарына жана мѳѳнѳтүнѳн мурда шайлоонун натыйжаларына таасир этүүчү шайлоо мыйзамдарын бузуулар жѳнүндѳ жана/же талапкерлердин мындайларга катыштыгы бар экендиги тууралуу каралбай калган материалдар жок.

Шайлоо мыйзамдарын бузуулар тууралуу арыздар жана билдирүүлѳр боюнча укук коргоо органдары жана прокуратура органдары тарабынан көрүлүп жаткан чаралар тууралуу маалыматты угуп жана талкуулап, Арыздарды жана даттанууларды кароо, маалымат маселелери жана үгүт эрежелери боюнча жумушчу топтун маалыматын эске алып, «Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө» Кыргыз Республикасынын конституциялык Мыйзамынын 43-беренесине ылайык, «Кыргыз Республикасынын Шайлоо жана референдум өткөрүү боюнча борбордук комиссиясы жөнүндө» Кыргыз Республикасынын конституциялык Мыйзамынын 3, 4, 8-беренелерин, Борбордук шайлоо комиссиясынын 2020-жылдын 4-февралдагы №33 токтому менен бекитилген «Ыкчам чара кѳрүү координациялык тобунун (ЫЧКТ) иштѳѳ тартиби жөнүндө» жобону жетекчиликке алып,

Кыргыз Республикасынын Шайлоо жана референдум өткөрүү боюнча борбордук комиссиясы

ЧЕЧИМ КЫЛАТ:

1. №5 Ноокат бир мандаттуу шайлоо округу боюнча Кыргыз Республикасынын Жогорку Кеңешинин депутатын мөөнөтүнөн мурда шайлоону даярдоонун жана өткөрүүнүн жүрүшүндө келип түшкөн шайлоо мыйзамдарын бузуулар жөнүндө арыздар жана билдирүүлөр боюнча укук коргоо органдары жана прокуратура органдары тарабынан кабыл алынган чаралар жөнүндө ыкчам чара кѳрүү координациялык тобунун жана арыздарды жана даттанууларды кароо, маалымат маселелери жана үгүт эрежелери боюнча жумушчу топтун маалыматы эске алынсын.

2. Шайлоо мыйзамдарын бузуулар боюнча кабыл алынган чаралар Кыргыз Республикасынын Шайлоо жана референдум өткөрүү боюнча борбордук комиссиясынын расмий сайтынын «2024-жылдын 30-июнуна дайындалган №5 Ноокат, №36 Ысык-Көл жана №29 Свердлов шайлоо округдары боюнча Кыргыз Республикасынын Жогорку Кеңешинин депутаттарын мөөнөтүнөн мурда шайлоо боюнча арыздардын жана мыйзам бузуулардын реестри» бөлүмүндө жарыялансын.

3. Бул чечим Кыргыз Республикасынын Шайлоо жана референдум өткөрүү боюнча борбордук комиссиясынын расмий сайтына жарыялансын.

4. Бул чечимдин аткарылышын контролдоо Кыргыз Республикасынын Шайлоо жана референдум өткөрүү боюнча борбордук комиссиясынын тѳрагасынын орун басары, Ыкчам чара кѳрүү координациялык тобунун жетекчиси Т.У.Шайназаровго жүктѳлсүн.

ТѲРАГА                                                                                                    Н.ШАЙЛДАБЕКОВА

Бишкек ш., 2024-жылдын 5-июлу

№246