Кыргыз Республикасынын Шайлоо жана референдум өткөрүү боюнча борбордук комиссиясы «Жергиликтүү кеңештердин депутаттарын шайлоо жөнүндө» Кыргыз Республикасынын 2024-жылдын 2-августундагы № 158 Мыйзамынын жаңы редакциясына киргизилген өзгөртүүлөргө ылайык бир катар чечимдерди кабыл алды жана жергиликтүү кеңештердин депутаттарын шайлоону ѳткѳрүүнүн тартиби боюнча ченемдик укуктук актыларды шайлоо мыйзамдарына ылайык келтирүү үчүн түзѳтүүлѳрдү киргизди.

Шайлоо мыйзамдарына кабыл алынган өзгөртүүлөргө ылайык, «Шайлоо округдарынын жана шайлоо участкаларынын схемаларын жана чек араларын башкаруунун тартиби жөнүндө», «Жергиликтүү кеңештердин депутаттарын шайлоодо добуш берүүнү уюштуруу жана өткөрүү, добуш берүүнүн жыйынтыктарын белгилөө жана шайлоо комиссиялары тарабынан шайлоонун натыйжаларын аныктоо жөнүндө», «Жергиликтүү кеңештердин депутаттарын шайлоодо шайлоо комиссиялары тарабынан добуш берүүнү уюштуруу жана өткөрүү жөнүндө», “Шайлоолорду жана референдумдарды өткөрүүдө ден соолугунун мүмкүнчүлүгү чектелген жарандардын шайлоо укуктарын ишке ашырууну камсыз кылуу жѳнүндѳ”, “Кыргыз Республикасынын шайлоолорун жана референдумдарын өткөрүүдө айрым категориядагы жарандардын шайлоо укуктарын камсыз кылуу жөнүндө” жоболорго жана “Шайлоочуларды идентификациялоонун тартиби жөнүндө” нускамага колдонмого жергиликтүү кеңештердин депутаттарын шайлоодо тѳмѳндѳгүдѳй айрым нормалар киргизилди:

- санариптештирүүгө байланыштуу жарандардын-шайлоочулардын катышуусунун айрым жол-жоболору такталды, тактап айтканда, шайлоочуларды идентификациялоо электрондук документтерди колдонуу менен жүргүзүлүшү мүмкүн;

- ар бир шайлоо участогунда шайлоочулардын максималдуу санына карата өзгөртүү киргизилди (мурда 2500 шайлоочу болсо, учурда 3000 шайлоочу болот);

- аймактык шайлоо комиссиялары жергиликтүү өз алдынча башкаруу органдарынын сунушу боюнча (мурда - жергиликтүү өз алдынча башкаруу органдарынын катышуусу менен) шайлоо округдарынын схемасын жана чек араларын иштеп чыга тургандыгы белгиленген. Мындан тышкары, округдарды аныктоо шайлоо күнү дайындалгандан кийин 3 календардык күндөн кечиктирбестен калкты каттоо, жер ресурстарын башкары чөйрөсүндөгү ыйгарым укуктуу мамлекеттик органдар жана жергиликтүү өз алдынча башкаруу органдары тарабынан берилген маалыматтардын негизинде жүргүзүлөрү такталган;

- аралыктан же электрондук добуш берүүнү колдонуу мүмкүнчүлүгү каралган шайлоолорду өткөрүүнүн нормасы киргизилди. Бирок ошол эле учурда аралыктан, электрондук добуш берүүнү өткөрүү чечими шайлоо дайындалганда кабыл алынат.

Киргизилгоен түзөтүүлөр шайлоо процессинин ачык-айкындуулугун жана адилеттүүлүгүн камсыз кылууга, ошондой эле жарандардын, анын ичинде ден соолугунун мүмкүнчүлүгү чектелген жарандардын жана айрым категориядагы жарандардын шайлоого катышуусу үчүн шарттарды жакшыртууга багытталган.

Кыргыз Республикасынын Шайлоо жана референдум өткөрүү боюнча борбордук комиссиясы өлкөдөгү демократияны жана мыйзамдуулукту камсыз кылуу үчүн бардык жарандарды шайлоого активдүү катышууга жана мыйзамды сактоого чакырат.

“Жергиликтүү кеңештердин депутаттарын шайлоо жөнүндө” Кыргыз Республикасынын 2024-жылдын 2-августундагы № 158 Мыйзамына жаңы редакцияда киргизилген өзгөртүүлөр жана ички жоболор жөнүндө толук маалыматты КР БШКнын расмий сайтынан алса болот.