2024-жылдын 25-27-апрелинде Нарын шаарында Жарандык билим берүү жана шайлоо технологиялары борбору (ЖБШТБ) IFES менен биргеликте жарандык билим берүүнүн алкагында Ысык-Көл жана Нарын облустарынын жаштары: студенттер, жарандык активисттер, мүмкүнчүлүгү чектелген адамдар үчүн

мамлекеттик бийликтин жана шайлоо процесстеринин негиздери боюнча үч күндүк тренинг өткөрүштү.

Үч күндүк “Жаш жаран мектеби” программасы жаштардын чечим кабыл алуу процессине катышуусу жана бүгүнкү жана эртеңки саясатты түзүүдө өз пикирин айтуусу эмне үчүн маанилүү экенин баса белгиледи. Жаш муундун муктаждыктарын эске алган туруктуу жана тынч коомду куруу үчүн жаштардын шайлоолорго инклюзивдүү катышуусу абдан маанилүү.

Республика боюнча бардык шайлоочулардын тизмесинин түзүмүндө Кыргызстандагы жаш шайлоочулардын үлүшү (18-35 жаштан) 43,57% түзөт, бул 1735417 адам, ошондуктан шайлоого жоопкерчиликтүү, аң-сезимдүү мамилени калыптандыруу маанилүү. Шайлоого катышуу жана добуш берүү аркылуу жаштар мамлекеттин өнүгүшүнө таасирин тийгизип, өзүн көрсөтүүгө мүмкүнчүлүк алышат.

Бул иш-чарада катышуучулар аялдардын саясатка катышуусун арттырууга багытталган атайын чаралар менен тааныштырылды. Тең мүмкүнчүлүктөрдү камсыз кылуунун, жергиликтүү өз алдынча башкаруу органдарында аялдардын өкүлчүлүгүнө жана жергиликтүү деңгээлде башкарууга катышуусуна шарттарды түзүүнүн алкагында айылдык кеңештерде мандаттын 30%дан кем эмесин аялдарга калтыруу боюнча атайын мыйзамдык чаралар көрүлгөн. Бул чара жергиликтүү кеңештерде аялдардын өкүлчүлүгүн 9 пайыздан 38 пайызга чейин көбөйтүүгө мүмкүндүк берди.

Ошондой эле жаштарга ден соолугунун мүмкүнчүлүгү чектелген жарандардын шайлоо укуктарын камсыз кылуу боюнча чаралар тууралуу айтылды. Мүмкүнчүлүгү чектелген шайлоочулар үчүн инклюзивдик чөйрөнү камсыз кылуу, анын ичинде өлкөнүн саясий турмушуна бирдей жана инклюзивдүү катышууну камсыз кылуу көз карашынан алганда өтө маанилүү. КР БШКнын негизги багыты алмаштыруучу ыкмадан мүмкүнчүлүгү чектелген адамдардын добуш берүү жайларында шайлоого түздөн-түз катышуусуна жана бардык жарандар сыяктуу эле ден соолугунун мүмкүнчүлүктөрү чектелүү адамдар бирдей укуктарга ээ болушуна өтүү болуп саналат. Күчтүү коом анын бардык мүчөлөрүн, анын ичинде ден соолугунун мүмкүнчүлүгү чектелген жарандарды камтымайынча мүмкүн эмес. Демократиялык коомдо ар бир адамдын үнүн угушу абдан маанилүү.

Катышуучуларга мамлекеттик башкаруу системасы, адам жана жарандык укуктар жөнүндө билимдерден тышкары, шайлоонун ачык-айкындуулугун жана ишенимдүүлүгүн камсыз кылган шайлоо технологияларынын иши көрсөтүлдү жана добуш берүү күнүнүн жол-жобосун моделдештирүү жүргүзүлдү.

Жаш жаран мектебинин катышуучулары Нарын шаарынын мэриясына, аймактык шайлоо комиссиясына, Нарын шаарындагы Жарандык жана санариптик билим берүү борборлоруна барып, алардын иштери менен таанышууга мүмкүнчүлүк алышты. Жаштар Нарын районунун акиминин орун басары Э.Б.Жанболотова жана Нарын шаардык мэриясынын аппарат башчысы

Н. Кайыпов менен жолугушуп, балдар өздөрүн кызыктырган суроолорду беришти.

Иш-чаранын соңунда катышуучуларга сертификаттар тапшырылды.