Бүгүн, 18-апрелде КР БШК жыйынында Кыргыз Республикасынын Жогорку Кеңешинин депутаттарын мөөнөтүнөн мурда шайлоого даярдыктын жүрүшү боюнча ЫЧКТ жана даттанууларды жана үгүт иштерин жүргүзүү эрежелерин кароо боюнча Жумушчу топтун маалыматы угулду.

ЫЧКТнын жетекчиси, Борбордук шайлоо комиссиясынын төрагасынын орун басары Т.У.Шайназаров жүргүзүлүп жаткан иштер тууралуу маалымат берди.

“Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө” конституциялык Мыйзамдын жана Календардык пландын талаптарын жетекчиликке алып, үч шайлоо округу боюнча ЫЧКТнын курамы бекитилди, ал шайлоо мыйзамдары бузулган учурда мониторинг жүргүзөт жана ыкчам чара көрөт.

Бүгүнкү күнгө чейин ЫЧКТга эч кандай арыз, билдирүү жана мыйзам бузуулар жѳнүндѳ маалымат түшкөн эмес. Округдардагы абал комиссиялардын жана укук коргоо органдарынын туруктуу көзөмөлүндө.

Кыргыз Республикасынын Жогорку Кеңешинин депутаттарын мөөнөтүнөн мурда шайлоону даярдоо боюнча арыздарды жана даттанууларды кароо, маалыматтык маселелерди жана үгүт эрежелери боюнча жумушчу топтун жетекчиси, БШКмүчөсү У.Жылкыбаев азыркы этапта мөөнөтүнөн мурда шайлоонун азыркы этабында талапкерлер жана алардын ыйгарым укуктуу адамдары тарабынан үгүт эрежелерин бузуулар катталбагандыгын билдирди. Белгиленгендей, шайлоо мыйзамдарынын бузулгандыгы тастыкталбаган бир сигнал келип түшкөндүгү белгиленди. Бул маселе боюнча түшүндүрүү иштери жүргүзүлдү. Жумушчу топ үгүт эрежелеринин сакталышын көзөмөлдөөнү улантууда.

Азыркы учурда шайлоо процессинин эң активдүү этабы - шайлоо алдындагы үгүт иштери жүрүп жатат, ал 2024-жылдын 27-апрелинин саат 8.00гө чейин созулат.

2024-жылдын 15-апрелинен бери округдардагы шайлоо комиссиялары талапкерлердин шайлоочулар менен биргелешкен жолугушууларын өткөрүүдө. Жолугушууларда талапкерлер шайлоочуларды шайлоо алдындагы программалары менен тааныштырып, жарандардын суроолоруна жооп беришет. Ошондой эле жолугушуулардын жүрүшүндө райондордун өнүгүүсүнүн социалдык, экономикалык жана экологиялык жагдайларын камтыган кеңири чөйрөдөгү маселелер талкууланууда.

Талапкерлерди шайлоочуларга маалымдоо максатында «Ош УТРК» жана «Баткен УТРК» телеканалдарында дебаттар өткөрүлүүдө.

Бүгүнкү күндѳ бир мандаттуу үч округ боюнча шайлоого 33 талапкер: Баткен районунан 10 талапкер, Кара-Суу районунан 9 талапкер, Ош районунан 14 талапкер катышууда.

Буга чейин бардык талапкерлер шайлоону мыйзам чегинде өткөрүү боюнча Меморандумга кол коюшкан, ага ылайык алар мыйзам чегинде гана иш алып барууга, бири-бирине, анын ичинде социалдык тармактар ​​аркылуу “кара пиарды” колдонбоого, добуштарды сатып алуудан жана шайлоочулардын добушун алуу үчүн административдик ресурсту колдонуудан баш тартууга ж.б. милдеттенишкен.

БШКда белгилегендей, мындай меморандумдарга мурда да кол коюлган, бирок көп учурда айрым талапкерлер тарабынан аткарылбай келген. Азыркы шайлоодо талапкерлер тарабынан айтылган милдеттенмелер негизинен аткарыла баштагындыгы байкалууда. БШК талапкерлерди мындан ары да мыйзам так сактоого чакырат жана талапкерлер арасында таза атаандаштык болот деп үмүттөнөт.

Шайлоочулардын биротоло тизмеси 21-апрелден кийин жарыяланат. Андан кийин ар бир шайлоочуга билдирүү – алар добуш бере турган шайлоо участогунун дареги жана талапкерлер тууралуу маалымат көрсөтүлгөн чакыруу жѳнѳтүлѳт.

28-апрелге дайындалган мөөнөтүнөн мурда ѳтүүчү шайлоолор тууралуу шайлоочуларды максималдуу түрдө кабардар кылуу үчүн БШК тарабынан шайлоого активдүү катышууга жана жарандык позициясын билдирүүгө чакырыктар менен видеоматериалдар жана СМС билдирүүлөр даярдалды.

БШКнын маалымат бөлүмү