2024-жылдын 20-февралында Чүй облусунун Чүй районунун жаңыдан түзүлгөн Бурана айыл аймагынын кеңешинин уюштуруу сессиясы болуп өттү.

Жалпы 11590 адам жашаган Бурана айыл аймагы Бурана жана Ак-Бешим айыл аймактарын бириктирүү менен түзүлгөн.

Бурана айылдык кеңешинде биригүүнүн натыйжасында депутаттардын саны 32 депутатты түздү: Бурана кеңешинин 21 депутаты жана Ак-Бешим кеңешинин 11 депутаты.

Бурана айыл аймагынын кеңешинин сессиясын жашы боюнча эң улуу Джусупова Калбубу депутат ачып, төрагалык кылды.

Бурана жана Ак-Бешим айыл аймактарынын учурдагы төрагаларынын ичинен Исагалиев Алмазбек Бейшекеевич  жана Наматбеков Алмазбек Жумабекович ортосунда шайлоо болуп өттү.

Сессияга бириккен Бурана айыл аймагынын 28 депутаттары катышты.

Ачык добуш берүүнүн жыйынтыгы менен 17 добуш алып, Исагалиев Алмазбек Бейшекеевич бириккен Бурана айылдык кеңешинин төрагасы болуп шайланды.

Маалымат үчүн:

2024-жылдын 20-22-февралында аймактарда жаңыдан уюшулган айыл аймактарынын кеңештеринин төрагаларын шайлоо боюнча уюштуруу сессиялары өтүүдө.

Жалпысынан 230 айыл аймагын бириктирүүнүн негизинде түзүлгөн бириктирилген 117 айыл аймактарынын кеңешинин төрагаларын шайлоо зарыл.

Шайлоолор Кыргыз Республикасынын Президентинин 2024-жылдын 7-февралындагы ПЖ №24 Жарлыгы менен бекитилген “Пилоттук режимде жүргүзүлүп жаткан административдик-аймактык реформанын алкагында жергиликтүү кеңештердин иши жөнүндө убактылуу жобо” негизинде өткөрүүлүүдө:

“Айыл аймактарын бириктиргенде, бириккен айыл аймагын түзгөн айыл аймактарынын кеңештеринин ыйгарым укуктары токтотулат.

Жаңыдан түзүлгөн айылдык аймактын кеңеши бирдиктүү айыл аймагын түзгөн айылдык кеңештердин укук улантуучусу болуп калат”.

“Жергиликтүү кеңештердин депутаттары тийиштүү жергиликтүү кеңештердин депутаттары болгон айыл аймагы же калктуу пункту кошулган же кошулган айылдык аймактын же шаардын кеңешинин курамында ишин улантат. Ошол эле учурда алардын ыйгарым укуктары ыйгарым укуктарынын мөөнөтү аяктаганга чейин же мыйзамдык жөнгө салууга чейин сакталат”.

КР БШК маалымат бөлүмү