Жалпысынан Координациялык Ыкчам чара көрүү тобуна мыйзам бузуулар боюнча 6 арыз, даттануу келип түшкөн, анын ичинен бешөө шайлоого даярдык көрүү мезгилинде, бирөө шайлоо күнү добуш берүү башталгандан тарта келип түшкөн, - бул тууралуу  бүгүн брифингде Координациялык Ыкчам чара көрүү тобунун жетекчиси Тынчтыкбек Шайназаров билдирди.
4 даттануу боюнча Бишкек шаарынын Ленин райондук ички иштер бөлүмү тарабынан ыкчам-иликтөө иш-чаралары жүргүзүлүп, жыйынтыгында кылмыш ишин козгоодон баш тартылган. Бишкек шаарынын Ленин районунун прокуратурасы тарабынан кабыл алынган чечимдердин мыйзамдуулугу жана негиздүүлүгү текшерилди. Дагы 2 даттануу боюнча тиешелүү текшерүүлөр жүргүзүлөт.
Координациялык Ыкчам чара көрүү тобунун жетекчиси учурдагы шайлоо өнөктүгүнүн алкагында шайлоо мыйзамдарынын бузулушу боюнча даттануулар аз болгонун белгилеп, мындан ары да шайлоо мыйзам бузуу фактылары катталбастан өтөөрүнө ишеним артты.
БШК шайлоонун айкындуулугун, ачыктыгын жана мыйзамдуулугун камсыздоо максатында БШКнын Координациялык Ыкчам чара көрүү боюнча тобу иштеп жатканын, анын курамына БШКнын, ички иштер органдарынын, прокуратуранын жана  УКМКнын өкүлдөрү кирээрин эске салат.
Координациялык топ бузуулар жөнүндө билдирүүлөрдү талдоо жана текшерүү, бузуучулар үчүн ыкчам жоопкерчилик чараларын көрүү жана көрүлгөн чаралар тууралуу жарандарды маалымдоо боюнча иштерди жүргүзөт.
Шайлоо учурунда кандайдыр бир мыйзам бузуу аракеттери болсо Координациялык ыкчам чара көрүү тобу - 1255, ишеним телефону - 0 (312) 66024 номерлери аркылуу кайрылууну өтүнөт.