Бирдиктүү шайлоо округдары боюнча Жогорку Кеӊештин депутаттарын шайлоого шайлоочулардын тизмесинде катталган жалпы жарандардын саны 3 703 420 адамды түздү.

Алардын ичинен 84 128 шайлоочу республикадан тышкары түзүлгөн шайлоо участкаларындагы шайлоочулардын тизмесине кирген.   

Бир мандаттуу шайлоо участкалары боюнча шайлоочулардын саны 3 619 292 адамды (чет өлкөлөрдө катталган шайлоочуларды эске албаганда) түздү.

2021-жылдын 9-сентябрында жайгаштырылган бир мандаттуу округдар боюнча алдын ала тизме (3 617 591 адам) менен салыштырмалуу, 1701 шайлоочуга көбөйгөн (кеӊири маалыматты «Тизме» порталынан - https://tizme.gov.kg/ көрүүгө болот).

Салыштырма иликтөөнүн негизинде, шайлоочулардын саны өскөнү байкалууда. Алсак, 2020-жылдын октябрындагы КР ЖК депутаттарын шайлоодо 3 523 554 шайлоочу, алардын ичинен ТИМ багыты боюнча - 32 602 шайлоочу катталган. Шайлоочулардын өсүшү 179 866 жана 51 526 адамды түзгөн.

Гендердик-курактык көрсөткүч боюнча шайлоочулардын тизмесинин курамы төмөнкүчө: 

• эркектер – 1 775 935, бул жалпы шайлоочулардын санынын 48%ын түзөт;   
• аялдар – 1 927 485, бул жалпы шайлоочулардын санынын 52%ын түзөт.   

Шайлоо участкаларына биринчи жолу 84 412 адам келет, бул жалпы шайлоочулардын санынын 2% түзөт.