Эки саясий партиянын – «Биздин Кыргызстан» партиясынын тизмесинен 38 аял талапкерди (Ош АШКнын 2021-жылдын 15-июлундагы чечими) жана «Ата-Журт Кыргызстан» партиясынын тизмесинен 39 талапкерди, анын ичинде 31 аял талапкерди (Ош АШКнын 2021-жылдын 12- августундагы чечими) катталган тизмелерден чыгаруу жѳнүндѳ Ош АШКнын чечимдери БШКга түштү. Ошол эле учурда Ош шаардык кеңешинин 6 депутатынын, анын ичинде 5 аялдын, ыйгарым укуктарын мөөнөтүнөн мурда токтотуу жана бош мандаттарды тизме боюнча кийин турган талапкерлерге өткөрүп берүү жѳнүндѳ ушул эки саясий партиянын чечимдери түштү.

Мында «Кыргыз Республикасынын Шайлоо жана референдум өткөрүү боюнча борбордук комиссиясы жөнүндө» Кыргыз Республикасынын конституциялык Мыйзамынын 4-беренесинин 1-бөлүгүнүн 28-пунктуна ылайык жергиликтүү кеңештин депутатынын ыйгарым укуктарын мөөнөтүнөн мурда токтотуу жөнүндө, жергиликтүү кеңештин депутатынын бош калган мандатын өткөрүп берүү жөнүндө, жергиликтүү кеңештин депутаттыгына талапкерлерди катталган тизмеден чыгаруу жөнүндө АШКлардын чечимдери БШК тарабынан бекитилүүгө тийиш.

Бүгүн – 2021-жылдын 25-августундагы жыйналышында талкуудан кийин Борбордук шайлоо комиссиясынын мүчөлөрү талапкерлердин катталган тизмелеринен аялдардын жапырт чыгаруу, ошондой эле аял депутаттардын ыйгарым укуктарынын мөөнөтүнөн мурда токтотуу боюнча аймактык шайлоо комиссиясынын чечимдеринин баардык жагдайлары кылдат иликтөөнү талап кылат деп чечишти.

Ошентип, бул маселени БШК карап чыккыча, өз ыйгарым укуктарын мөөнөтүнөн мурда токтотуу жөнүндө арыз берген депутаттар Ош шаардык кеңешинин иштеп жаткан депутаттары катары кала беришет.

КР БШК аппаратынын маалымат бөлүмү